Bakıda Cəlilabad rayon sakini, 1999-cu il təvəllüdlü Şahlar Ağayev iş yoldaşı, 1992-ci il təvəllüdlü Pünhan Fərzalı ilə mübahisə edib. Hadisə nəticədə ölümə səbəb olub.
Şahlar işlədiyi çörək sexində geyim otağında Pünhanın çiyninə toxunaraq "olar keçim, qardaşım?" deyib. Pünhanın buna aqressiv reaksiya verməsindən sonra tərəflər arasında narazılıq yaranıb.
Şahlar ifadəsində bildirib ki, məsələni böyütməməyə çalışıb, Pünhandan bir neçə dəfə üzr istəyib. Hətta rəhbərliyə ərizə yazaraq aralarında problem olmadığını bildirib və Pünhanın da işdən çıxarılmaması üçün onun yerinə ərizə yazıb.
Lakin onun sözlərinə görə, Pünhan aqressiv davranmaqda davam edib. Tərəflər daha sonra telefonla danışıb və görüşmək qərarına gəliblər. Şahlar Pünhanın təklif etdiyi "Qara Qarayev" metrostansiyasına getməkdən yayınaraq daha yaxın ərazidə görüşməyi təklif edib.
Görüş zamanı mübahisə yenidən qızışıb. Şahlar ifadəsində Pünhanın onu hədələdiyini, hətta "mən İmişli balasıyam" dediyini bildirib. Daha sonra tərəflər arasında əlbəyaxa dava düşüb. Daha sonra Şahlar Pünhanı bıçaqlayıb. Pünhan aldığı xəsarətdən ölüb.
Şahların sözlərinə görə, o, özünü müdafiə etməyə çalışıb. Hadisə zamanı onun qollarında və üzündə bıçaq xəsarətləri, həmçinin qulağında kəsik yaranıb. Məhkəmədə o, qulağının kəsildiyini təsdiqləyən fotoşəkillərin və ekspert rəyinin olduğunu deyib.
Şahlar Ağayev məhkəmədə özünü qismən təqsirli bilib və Pünhanı öldürmək niyyətinin olmadığını deyib.
Bakı Ağır Cinayətlər Məhkəməsinin hökmü ilə Şahlar Ağayev 9 il müddətinə azadlıqdan məhrum edilib.
Mənbə: demokrat.az
