Cənub bölgəsinin ən böyük sitrusçuluq rayonlarından olan Lənkəranda feyxoa yığımı davam edir. Bu haqda məlumatı Cenublu.az bu gün, 28 oktyabr tarixində ARB Cenub-a istinadən verir.
Feyxoaçılıqla ən çox Lənkəranın Hirkan, Xanbulan, Vilvan, Qurumba, Rvo, Şovu ərazi vahidlərində məşğul olurlar.
Rvo kənd sakini Əliheydər Həsənovun pay torpağında 800 feyxoa ağacı var. Hər il bol məhsul toplayan təsərrüfatçı, bu il ötən ildəkindən 30-40 faiz çox, yəni 7 ton məhsul gözləyir.
Meyvə ağaclarının məhsuldarlığı onun yaşına görədir. 10 yaşlı ağacdan mövsüm ərzində 15-20 kq məhsul yığmaq olur. Digər sitrus və subtropik ağaclara nisbətən feyxoa az məsrəf, qulluq istəyir. Buna görə də daha rentabelli sayılır. Əvvəllər satışı daha zəif olduğuna görə bu sahəyə meyil az idi. Son illər vəziyyət dəyişib.
Qurumba kənd sakini fermer Kamal Hüseynov deyir ki, ilk mərhələdə qiymətlər yüksək olduğundan məhsulu daha çox ixrac etməyə üstünlük veririk.
Bu sahəyə meylin artması amillərindən biri də dövlət dəstəyidir. Feyxoa bağlarında yığım məhsulun növündən asılı olaraq, dekabrın əvvəllərinədək davam edəcək. Lənkəranda ümumilikdə 500 hektardan çox feyxoa bağı var ki, bunun da 80 faizi məhsuldardır.
