Sərbəst güləş idman növü üzrə əməkdar məşqçi Şirəli Rzayevin 65 illik yubileyi təşkil olunub. Bu haqda bu gün, 7 fevral tarixində Cenublu.az Lənkəran şəhər Gənclər və İdman İdarəsinə istinadən xəbər verir.
Tədbir zamanı çıxış edənlər əməkdar məşqçi Şirəli Rzayevin rayonda idmanın inkişafına göstərdiyi xidmətlərdən, məşqçi müəllim kimi səmərəli fəaliyyətindən, rayonda yüksək nəticəli idmançılar yetişdirməsindən və nümunəvi müəllim olmasından danışaraq onu 65 illik yubileyi münasibətilə təbrik ediblər.
Çıxışlardan sonra Ş.Rzayev Lənkəran Şəhər Gənclər və İdman idarəsi və "Təhsil" RİM-in Lənkəran Şəhər Uşaq-Gənclər İdman-Şahmat Məktəbi tərəfindən Fəxri Fərmanla təltif edilib.
Eyni zamanda Lənkəran Şəhər Gənclər və İdman İdarəsinin kollektivi gənclər və idman sahəsində səmərəli fəaliyyətinə görə "Lənkəran" İdman Klubu tərəfindən Təşəkkürnamə ilə təltif edilib.
Tədbirdə 25 nəfər idman ictimaiyyətinin nümayəndələri iştirak ediblər.
