Lənkəran Şəhər İcra Hakimiyyəti Türkiyədə zəlzələdən zərər çəkmiş şəxslərə humanitar yardım göndərib. Bu haqda bu gün, 11 fevral tarixində Cenublu.az Lənkəran ŞİH-yə istinadən xəbər verir.
Türkiyədə baş verən dağıdıcı zəlzələdən zərər görmüş insanlara dəstək məqsədilə respublikamızın bütün ərazilərində olduğu kimi, Lənkəran rayonunda da humanitar yardım kampaniyası həyata keçirilir. Lənkəran rayonunda insanların şəxsi təşəbbüsü ilə keçirilən kampaniya zamanı, əsasən, hazır qida məhsullarının və qış geyimlərinin toplandığı humanitar yardım artıq Türkiyə Cümhuriyyətinin ölkəmizdəki səfirliyinə göndərilib.
Lənkəran Şəhər İcra Hakimiyyəti də can Türkiyəmizin yanında olduğunu nümayiş etdirərək ümumi dəyəri 50 min manat olan 15 ton Lənkəran düyüsü və 1 ton Lənkəran çayını zəlzələdən zərər çəkmiş insanlara humanitar yardım məqsədilə Kahramanmaraş şəhərinə göndərib. “Lənkəranlılar səninlədir, can Türkiyəm” şüarı altında yola salınan humanitar yardım lənkəranlıların daim türk qardaşlarının yanlarında olduqlarının təzahürüdür.
