Cənub bölgəsi üzrə kimya və biologiya fənləri üzrə fənn müsabiqəsinin final turu keçiriləcək. Bu haqda bu gün, 11 fevral tarixində Cenublu.az Lənkəran-Astara Regional Təhsil İdarəsinə istinadən xəbər verir.
Lənkəran-Astara Regional Təhsil İdarəsinin tabeliyində olan ümumi təhsil müəssisələrində Vətən müharibəsində şəhid olmuş Cəlilabad rayonunun Fərzili kənd ümumi orta məktəbinin kimya-biologiya müəllimi Rəhimov Tural Arif oğlunun xatirəsinə həsr olunmuş VIII–IX sinif şagirdləri arasında kimya və biologiya fənləri üzrə fənn müsabiqəsinin final turu baş tutacaq.
Fənn müsabiqəsinin keçirilməsində əsas məqsəd istedadlı şagirdləri aşkar etmək, onların potensial imkanlarının inkişafını təmin etmək, beynəlxalq olimpiadalara namizəd şagirdləri müəyyənləşdirmək, şagirdlərə vətənpərvərlik hissini aşılamaq və şəhidlərə olan ehtiramı əbədiləşdirməkdir.
Qeyd edək ki, fənn müsabiqəsinin rayon turunda 320 şagird biologiya, 280 şagird kimya fənni üzrə iştirak edib. Onlardan 37 şagird biologiya, 26 şagird kimya fənni üzrə final turunda iştirak etmək hüququ qazanıb.
