Daxili İşlər Nazirliyi İranın casus şəbəkəsinə qarşı xüsusi əməliyyat keçirib. Bu haqda məlumatı Cenublu.az bu gün, 31 yanvar tarixində Lent.az-a istinadən verir.
DİN tərəfindən əməliyyat keçirilən məkanlar arasında “SalamNews” və “İnterAz” informasiya agentlikləri də var. Əməliyyat nəticəsində 7 nəfər - A.T. Kərimov, E.A. Rəhimov, İ.Ə.Ələkbərov, M.N.Cəfərov, H.H. Cabbarlı, F.S. Əbdülov və A.Ə. Cümşüdov şübhəli şəxslər qismində saxlanılıblar.
Qeyd edək ki, hər iki kanalın sahibi Mətləb Bağırov əslən Cəlilabad rayonundandır. Onun, hətta İran, Rusiya və Azərbaycanda biznes obyektlərinin olduğu bildirilir.
Belə ki, “İnterAz” telekanalı 2002-ci ildə yaradılıb və 2007-ci ildə Rusiya Federal Vergi Xidmətinin Rayonlararası müfəttişliyində qeydiyyata alınıb. Əvvəllər baş ofisi Moskvada yerləşən kanalın təsisçisi tanınmış jurnalist Saleh Xudiyev olub. 2016-cı ildə telekanalı İranın Qum şəhərində və Suriyada dini təhsil almış “Hacı Mətləb” kimi tanınan Mətləb Bağırov alıb.
Hazırda kanalın baş ofisi Türkiyəyə keçirilib və “Türksat” peyki üzərindən yayımı təşkil olunur. Telekanalda İranın rəsmi şəxslərinin açıqlamaları, bu ölkənin maraqlarına xidmət edən məlumatlar çoxluq təşkil edir. Əvvəlki dövrdə telekanalda hazırda “Nardaran hadisələri”nə görə həbsdə olan Hacı Taleh Bağırzadə, Hacı Zülfüqar Mikayılzadə və İranla yaxınlığı ilə seçilən digər dindarlar geniş reklam olunublar.
“SalamNews” İnformasiya Agentliyi fəaliyyətə 1 mart 2010-cu ildən başlayıb. Agentliyin Bakı ofisi “İnterAz” TV-nin Bakı nümayəndəliyi ilə eyni ünvanda, Yasamal rayonu ərazisində yerləşir.
“SalamNews” İA-nın 2017-ci ildə farsdilli versiyası hazırlansa da, sonradan bu layihə qeyri-müəyyən səbəblərdən təxirə salınıb. Hazırda sayt Azərbaycan və rus dillərində fəaliyyət göstərir.
“SalamNews” İA əvvəlki dövrdə geniş iranyönümlü dini təbliğat aparsa da, hazırda İranın rəsmi şəxslərinin, dindarlarının müxtəlif açıqlamalarını yayımlayır, dini maarifləndirmə xarakterli materiallar paylaşır.
