Cəlilabad Rayon Mərkəzi Xəstəxanasında yeni doğulmuş körpənin ölümünün təfərrüatları məluma olub. Bu haqda məlumatı Cenublu.az bu gün, 30 avqust tarixində Report.az-a istinadən verir.
Xəstəxanadan bildirilib ki, yeni doğulan körpə kafi vəziyyətdə evə yazılıb: “Ağayeva Firuzə Əflatun qızı 22 avqust tarixində xəstəxanaya daxil olub və təbii doğuşla oğlan cinsli körpə dünyaya gətirib. Çəkisi 2,7 kq, boyu 48 sm olan körpənin xəstəxanada yatdığı vaxt bütün həyati göstəriciləri normal olub. Sonra ana özü və uşağının evə buraxılması üçün iltizamnaməyə qol çəkib. Onlar normal və sağlam uşaqla evə yazılıblar. Daha sonra körpə yaxınları tərəfindən xəstəxanaya gətirilib. Lakin onun artıq öldüyü məlum olub".
Qeyd edək ki, Cəlilabad rayon sakini, 30 yaşlı Firuzə Ağayevanın Rayon Mərkəzi Xəstəxanasında dünyaya gətirdiyi körpə 28 avqust tarixində yaşadığı evdə ölüb.
Faktla bağlı Cəlilabad Rayon Prokurorluğunda araşdırma aparılır.
