Masallı rayonunda orta məktəbdə şagirdlərdən biri kimyəvi məhluldan xəsarət almasına rəsmi münasibət açıqlanıb.
Lənkəran-Astara Regional Təhsil İdarəsindən bildirilib ki, Masallı şəhəri İntiqam Əsgərli adına 3 nömrəli tam orta ümumtəhsil məktəbində VIII siniflərdən birində kimya dərsi zamanı təcrübə prosesində kolbanın sürüşməsi nəticəsində içərisindəki məhlul partaya və yaxınlıqda olan şagirdlərdən birinin üzərinə sıçrayıb.
"Hadisədən dərhal sonra şagirdə ilkin yardım göstərilib, müayinə və zəruri tibbi yardım üçün müvafiq tibb müəssisəsinə yönləndirilib. Şagirdin səhhəti nəzarətdə saxlanılır", - deyə məlumatda bildirilib.
Tibbi Ərazi Bölmələrini İdarəetmə Birliyindən (TƏBİB) bildirilib ki, 2013-cü il təvəllüdlü yeniyetmə (qadın cinsli) sentyabrın 30-da saat 11:30-da Masallı Rayon Mərkəzi Xəstəxanasına müraciət edib:
"Ona sol gözün kimyəvi zədələnməsi diaqnozu təyin olunub, zəruri tibbi yardım göstərilib. Vəziyyəti qənaətbəxş qiymətləndirilən yeniyetmə ambulator müalicə üçün evə buraxılıb".
Mənbə: oxu.аz
