Cəlilabadda Vətən müharibəsi şəhidi Səyyad Əliyar oğlu Ağahüseynlinin doğum günündə ailəsi ziyarət olunub. Bu haqda məlumatı Cenublu.az bu gün, 31 yanvar tarixində Cəlilabad rayon Gənclər və İdman İdarəsinə istinadən verir.
Ziyarət zamanı şəhidin keçdiyi şərəfli döyüş yolundan söhbət açılıb.
Qeyd olunub ki, Səyyad Əliyar oğlu Ağahüseynli 30 yanvar 2002-ci ildə Cəlilabad rayonunun Qarazəncir kəndində dünyaya göz açıb. Orta təhsilini başa vurduqdan sonra o, hərbi xidmətə yollanıb. Vətən müharibəsi başlayanda təcrübəli əsgər kimi döyüş meydanına atılan Səyyad qısa müddət ərzində düşmənin qorxulu kabusuna çevrilən qəhrəmanlarımızdan biri kimi tanınıb.
İşğal altındakı torpaqların azad olunması uğrunda gedən ağır döyüşlərdə qəhrəmanlıqla vuruşub. O, düşmənin xeyli sayda canlı qüvvəsinin, hərbi texnikasının məhv edilməsində yaxından iştirak edib, bir sıra ağır əməliyyatlarda dəfələrlə şəxsi şücaətləri ilə seçilib. Buna görə də əsgər yoldaşları arasında böyük hörmət qazanıb.
Sonuncu dəfə Qubadlı istiqamətində gedən döyüşlərdə qəhrəmancasına vuruşan əsgərimiz 20 oktyabr 2020-ci ildə döyüş tapşırığının yerinə yetirilməsi zamanı şəhidlik zirvəsinə ucalıb. Səyyad Ağahüseynli 21 oktyabr tarixində Cəlilabad rayonunun Qarazəncir kəndində dəfn edilib.
Şəhidimiz Vətən müharibəsindəki xidmətlərinə görə ölümündən sonra “Vətən uğrunda”, "Cəsur döyüşçü" , "Cəbrayılın azad olunmasına görə" və "Qubadlının azad olunmasına görə" medalları ilə təltif edilib.
