Cəlilabadda ilk dəfə olaraq yerli kartof toxumlarından istifadə olunub. Bu haqda bu gün, 1 mart tarixində Cenublu.az ARB Cenub-a istinadən xəbər verir.
Yerli kartof toxumları təcrübə-sınaq məqsədilə yetişdirilib. Məqsəd kartofçuluq sahəsində yerli toxumçuluğun inkişaf etdirilməsidir.
Kartofçuluqda hər il yeniliklərin tətbiqi ilə məşğul olan təcrübəli fermer Vahid Ağayev rayonda ixracyönlü məhsul istehsalını qarşıya məqsəd qoyub. Bu ilki hədəflərindən biri də yerli kartofçuluğu inkişaf etdirməkdir.
Artıq bir müddətdir ki, yazlıq kartof əkininə başlanılıb. Bu il rayonda 5500 hektara qədər açıq sahələrdə kartof əkini planlaşdırılıb.
Hazırda əkin üçün ən müasir texnikaların mövcudluğuna baxmayaraq, Cəlilabadın bir çox kəndlərində kartof əkini qədim adət-ənənələrə uyğun olaraq həyata keçirilir. Ata qoşulan kotan vasitəsilə hazırlanmış torpaqda cərgələr çəkildikdən sonra kartoflar cərgələrə düzülür və təkrar at kotanı ilə kartofun üstü örtülür. Əkin zamanı paralel olaraq mineral gübrələrdən də istifadə olunur.
Qeyd edək ki, rayonda əkin aparılan kartof sahələrinin illik kartof təminatı təxminən 17-18,5 ton civarındadır. Ötən il rayonda 5450 hektar sahədə 152.600 ton kartof istehsal olunub. Tədərük olunan məhsulun 61.300 tonu xarici ölkələrə ixrac olunub. Ümumi hesablamalara görə, fermerlər təxminən 76 milyon manata yaxın gəlir əldə ediblər.
