Əliyar Əliyev 14 dekabr 1957-ci ildə Qubadlı rayonunun Qəzyan kəndində doğulub. 1975-ci ildə Azərbaycan Dövlət Bədən Tərbiyəsi İnstitutuna daxil olub. 1979-cu ildə institutu fərqlənmə diplomu ilə bitirərək, bir müddət rayonun Dondarlı kənd orta məktəbində idman müəllimi işləyib. 1980-1982-ci illərdə hərbi xidmət keçib.
Ə.Əliyev dəfələrlə klassik güləş üzrə respublika, ümumittifaq və beynəlxalq yarışların qalibi olub. Onun səkkiz yetirməsi respublika və SSRİ çempionu idi, biri isə Olimpiya yığma komandasında təmsil olunurdu.
Əliyar Əliyev Ermənistan ölkəmizə qarşı təcavüzə başlayanda cəbhəyə ilk könüllü gedənlərdən biri olub. Tabor komandiri Əliyar dəfələrlə düşmənə ağır zərbə vurub. O, 1992-ci ilin payızında 40 könüllü döyüşçü ilə birlikdə işğal altındakı Laçının kəndlərini 4 gün ərzində ermənilərdən azad edilməsində böyük əməyi olub.
Əliyar Əliyevin son döyüşü 1992-ci il oktyabrın 3-də Laçının 2 kilometrliyində olub. "Tikanlı zəmi" yüksəkliyi uğrunda döyüşdə o, qəhrəmancasına şəhid olub.
Şəhidimiz doğulduğu Qəzyan kəndində dəfn olunub. Azərbaycan Prezidentinin Sərəncamı ilə ölümündən sonra Azərbaycanın Milli Qəhrəmanı fəxri adına layiq görülüb.
