Ali Məhkəmədə Cəlilabadda həmkəndlisini öldürməkdə ittiham olunan Akif Heydərovun barəsindəki hökmdən verilən kassasiya şikayətinə baxılıb. Bu haqda məlumatı Cenublu.az bu gün, 17 fevral tarixində Pravda.az-a istinadən verir.
Hakim Ələsgər Novruzovun sədrliyi ilə keçirilən prosesdə qərar elan olunub. Qərara əsasən, onun kassasiya şikayəti təmin edilməyib.
Qeyd edək ki, daha öncə Lənkəran Ağır Cinayətlər Məhkəməsi Akif Heydərovu 11 il 6 ay müddətinə azadlıqdan məhrum edib və Şirvan Apellyasiya Məhkəməsi onun apellyasiya şikayətini təmin etməyib.
Xatırladaq ki, 4 dekabr 2021-ci ildə Cəlilabad rayonu, Sabirabad kənd sakini, 1999-cu il təvəllüdlü Vüsal Əliyevin yaşadığı kənd ərazisində bıçaqla xəsarət yetirilməsi nəticəsində xəstəxanada ölməsi barədə rayon prokurorluğuna məlumat daxil olub. Aparılan araşdırmalarla müəyyən edilib ki, zərərçəkmişin həmkəndlisi, 1976-cı il təvəllüdlü Akif Heydərov şəxsi münasibətlər zəminində aralarında yaranan mübahisə zamanı Vüsal Əliyevə sağ bud nahiyəsindən bıçaqla xəsarət yetirib, sonuncu aldığı xəsarətdən aparıldığı xəstəxanada ölüb.
Faktla bağlı Cəlilabad Rayon Prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb.
Akif Heydərov şübhəli şəxs qismində tutularaq istintaqa cəlb edilib.
