Cəlilabadda Xocalı soyqırımına həsr edilmiş sərgi təşkil olunub. Bu haqda bu gün, 23 fevral tarixində Cenublu.az Masallı Regional Mədəniyyət İdarəsinə istinadən xəbər verir.
Sərgi Cəlilabad 4 saylı şəhər klubunun, Dövlət Rəsm Qalereyasının və şəhər 9 saylı tam orta məktəbinin birgə təşkilatçılığı ilə baş tutub və Xocalı faciəsinin 31-ci ildönümünə həsr olunub.
Cəlilabad şəhər 9 saylı tam orta məktəbində keçirilən tədbirdə Masallı Regional Mədəniyyət İdarəsinin Cəlilabad rayonu üzrə nümayəndəsi Elnur Atakişiyev, Cəlilabad rayon Mədəniyyət Mərkəzinin direktoru Ramil İbrahimov, təşkilatçı müəssisələrin əməkdaşları, Cəlilabad Təhsil sektorunun aparıcı məsləhətçisi Elvin Cavadzadə, Tacəddin Əli, həmçinin məktəbin müəllim və şagird kollektivi iştirak ediblər.
Əvvəlcə faciə qurbanlarının və şəhidlərin əziz xatirəsi bir dəqiqəlik sükutla yad olunub.
Tədbiri giriş sözü ilə məktəbin direktoru Abdul Rzayev açaraq Xocalı soyqırımını Azərbaycan tarixinin ən dəhşətli və faciəli səhifələrindən biri, erməni millətçilərinin xalqımıza qarşı iki yüz il ərzində apardığı etnik düşmənçiliyin növbəti mərhələsi olduğunu vurğulayıb. Çıxışlarda şagirdlərə bu tarixi unutmamaq və unutdurmamaq tövsiyə edilib.
Yekunda soyqırıma həsr olunmuş sərgiyə baxış keçirilib.
