Cəlilabadda binaları qəzalı vəziyyətdə olduğuna görə kirayədə yaşayan sakinlər 2 aydır ki, kirayə pullarını ala bilmirlər. Bu haqda məlumatı Cenublu.az bu gün, 18 fevral tarixində “Xəzər Xəbər”ə istinadən verir.
Belə ki, Azərbaycan küçəsində yerləşən 4 binanın sakinləri 6 aydır ki, müxtəlif ünvanlarda mənzil kirayələyiblər. Kirayə haqları ötən ilin sonuna qədər onların kart hesablarına köçürülüb. Yanvar ayından isə bilmədikləri səbəbdən kirayə haqqının ödənilməsi dayandırılıb.
Sakinlər deyirlər ki, bir neçə dəfə aidiyyəti qurumlara müraciət etmələrinə baxmayaraq, problem həllini tapmayıb.
Məsələ ilə bağlı Cəlilabad Mənzil İstismar İdarəsindən bildirdilər ki, problemlə bağlı Nazirlər Kabinetinə artıq müraciət olunub. “Qısa vaxt ərzində vəsait ayrılıb sakinlərin kart hesablarına köçürüləcək”, - deyə qurumdan bildirilib.
