Bu gün, 18 oktyabr tarixində şəhid polkovnik Rahim Əhməd oğlu Əliyevin doğum günüdür.
Rahim Əliyev 1967-ci ildə Lənkəran şəhərində anadan olub. Cəmşid Naxçıvanski adına hərbi liseyi bitirib. Hərbi liseyi bitirdikdən sonra Ukrayna Ali Hərbi Akademiyasında təhsilini davam etdirib. Ali Hərbi Akademiyanı bitirdikdən sonra bir müddət Almaniyada təhsil alıb. Birinci Qarabağ müharibəsi zamanı könüllü şəkildə ordu sıralarına qoşulur və Ağdamın Cəvahir kəndində istehkamçılar üçün təlim yeri yaradır. Uzun müddət Azərbaycan Silahlı Qüvvələrinin tərkibində fəaliyyət göstərib. Polkovnik Rahim Əliyev Azərbaycanın ilk mühəndis-istehkamçılarından olub. 1992-ci ildə Fred Asifin yaratdığı 859 saylı hərbi hissədə erməni işğalçılarına qarşı döyüşlərdə iştirak edib. Ağdərədən tutmuş Füzuliyə qədər neçə-neçə əməliyyatda iştirak edib.
Rahim Əliyevin müstəqil Azərbaycanın ordu quruculuğunda çox böyük fəaliyyəti olub. Polkovnik Rahim Əliyev Aprel döyüşləri zamanı Lələtəpənin işğaldan azad olunmasında fəal iştirak edib. Aprel döyüşlərində fəal iştirakına görə Prezident İlham Əliyev tərəfindən "Vətən Uğrunda" və "İgidliyə görə" medalları ilə təltif olunub.
Rahim Əliyev 20 yanvar 2018-ci ildə ordumuz tərəfindən hazırlanan yeni qurğuların istifadə olunduğu ərazidə döyüş tapşırığını yerinə yetirən zaman silah yoldaşlarına özünü sipər edərək minaya düşüb və şəhid olub. Polkovnik Rahim Əliyev Bakıda, "Qurd Qapısı" deyilən ərazidə – hərbçilərin qəbiristanlığında torpağa tapşırılıb.
