Bu gün, 20 oktyabr tarixində Azərbaycan Silahlı Qüvvələrinin mayoru, Vətən müharibəsi şəhidi Kamran Qılman oğlu Fərəcovun anım günüdür.
Kamran Fərəcov 14 yanvar 1978-ci ildə Astara rayonunun Səncərədi kəndində anadan olub. 1984-1995-ci illərdə Z.Bünyadov adına Astara şəhər 2 nömrəli məktəbində təhsil alıb. 1995-ci ildə Bakı Ali Birləşmiş Komandanlıq məktəbinin Taktiki Tank Qoşunları komandiri fakültəsinə daxil olub. 1999-cu ildə leytenant kimi məzun olan Fərəcov Bakıda taqım komandiri vəzifəsində xidmətə başlayıb. Sonra Ağdamda, Gəncədə, Goranboyda cəbhə bölgəsində xidmət edib.
2018-ci ildə "Azərbaycan Ordusunun 100 illiyi” yubiley medalı ilə təltif edilib. Kamran Fərəcov 20 sentyabr 2020-ci ildən könüllü təlimlərə qatılıb, şəxsi heyəti döyüşə hazırlayıb. Vətən müharibəsi zamanı Cəbrayılın və Qubadlının azadlığı uğrunda gedən döyüşlərdə savaşıb.
Kamran Fərəcov 20 oktyabr Qubadlı döyüşləri zamanı şəhid olub və doğulub boya-başa çatdığı Astara rayonunda dəfn olunub. Şəhidimizin 2 əkiz qızı – Dəniz və Şəmsi yadigar qalıblar.
