Bu gün, 19 oktyabr tarixində Azərbaycan Silahlı Qüvvələrinin müddətdən artıq xidmət edən hərbi qulluqçusu, Vətən müharibəsi şəhidi Fariz Fərhad oğlu Zülfüqarzadənin anım günüdür.
Fariz Zülfüqarzadə 20 noyabr 1992-ci ildə Lənkəran şəhərində anadan olub. 1997-ci ildə ailəsi ilə birlikdə Rusiyaya köçüb və 2007-ci ildə Azərbaycana, Lənkəran şəhərinə qayıdıb. Təhsilini Lənkəran şəhər 4 saylı orta məktəbində (rus bölməsində) davam etdirib. Orta təhsilli olub.
2012-2013-cü illərdə hərbi xidmətdə olan Fariz Zülfüqarzadə 2015-ci ilin mart ayından müddətdən artıq xidmət edən hərbi qulluqçu kimi yenidən orduya qayıdaraq tankçı kimi hərbi xidmətini davam etdirib. Aprel döyüşlərində Lələtəpə uğrunda mübarizədə fəal iştirak edib.
27 sentyabr 2020-ci ildə başlanan İkinci Qarabağ müharibəsi zamanı Silahlı Qüvvələrin sərrast tankçısı olan Fariz Zülfüqarzadə Füzuli, Zəngilan, Qubadlı uğrunda gedən döyüşlərdə düşmənin zirehli texnikalarını və atəş məntəqələrini darmadağın edib. 2 dəfə yaralansa da, yenidən döyüş meydanına qayıdır. Sonuncu döyüşünü oktyabr ayında Qubadlı rayonunda keçirir. 20 gün tankı düşmən tərəfindən hədəfə alınsa da, cəsur tankçımızın atəşini susdura bilmirlər. Düşmən tərəfindən vurulan tankın yaralı heyətini xilas etsə də, o, öz həyatını vətənin azadlığı uğrunda qurban verir. 19 oktyabr Lənkəran şəhərində dəfn olunub.
Ölümündən sonra "Vətən uğrunda", "İgidliyə görə", "Füzulinin azad olunmasına görə" və "Qubadlının azad olunmasına görə" medalları ilə təltif olunub.
