Hirkan Milli Parkı 9 fevral 2004-cü ildə yaradılıb. Milli Park Azərbaycanın cənub-şərqini, Lənkəran, Astara və Lerik inzibati rayonlarının ərazisini əhatə edir. Bu Milli Park Azərbaycanın ən qədim qoruqlarından biri hesab edilir.
Milli park 21 min hektardan çox ərazidə yaradılıb, sonradan onun ərazisi təxminən 41 min hektara çatdırılıb. Hirkan meşələrinin hər min hektarına 32 bitki növü düşür. Bu göstəriciyə görə milli park Qafqazın xarakterik floraya malik 18 ərazisi arasında birinci yeri tutur.
Azərbaycanda yayılan 435 ağac və kolun 150-si Hirkan meşələrində bitir, onlardan 36-sı isə endemikdir. Burada “Qırmızı Kitab”a daxil edilmiş Hirkan şümşadı, Hirkan ənciri, ipək akasiyası, ürəkyarpaq qızılağac, vəhşi heyvan növlərindən isə ayı, vaşaq, dağ keçisi, xallı maral, çöl donuzu, bəbir və s. qorunur.
