Böyrəkdə daşların yaranması cənub bölgəsində çox rast gəlinən bir haldır. Bu haqda məlumatı Cenublu.az bu gün, 22 fevral tarixində Azərbaycan Tibb Universitetinin (ATU) Urologiya kafedrasının dosenti Rəşad Məmmədova istinadən xəbər verir.
R.Məmmədovun sözlərinə görə, böyrək daşının yaranması xəstənin yaşından asılı deyil: “Praktikamızda əməliyyat etdiyimiz ən kiçik xəstəmizin 2, ən yaşlısının isə 92 yaşı olub. Bu problem bəzən xəstənin yaşadığı bölgədən asılıdır. Məsələn, böyrək daşlarına cənub bölgəsinin sakinlərində daha çox rast gəlinir. Bu, müəyyən irsi və metabolik xəstəliklərlə də bağlı ola bilir”.
Böyrəkdəki daşların tərkibinə görə də fərqləndiyini söyləyən mütəxəssis: “Böyrək daşları tərkibinə görə həm infeksion, həm də oksalat olur. Azərbaycanda rentgen neqativ (urat) daşlara da kifayət qədər çox rast gəlinir. Bu isə azərbaycanlıların menyusunda ət yeməklərinin çox olması ilə əlaqədardır. Böyrək daşlarının perkutan üsulla çıxarılması əməliyyatında əsas risk qanaxma ilə bağlıdır. Çünki böyrəkdən bir dəqiqə ərzində bir litrə qədər qan keçir”, - deyə bildirib.
