Lənkəranda “Gəncliyimizi narkomaniyadan və erkən nikahdan qoruyaq!” mövzusunda maarifləndirici tədbir keçirilib. Bu haqda bu gün, 9 fevral tarixində Cenublu.az Lənkəran şəhər Gənclər və İdman İdarəsinə istinadən xəbər verir.
Tədbir Lənkəran rayonu Boladi kənd 2 saylı tam orta məktəbində keçirilib. Məktəbin direktoru Sehran Əliyev, Lənkəran Şəhər Gənclər və İdman İdarəsinin rəis müavini Sadiq Həmidov, Lənkəran Şəhər Rayon Polis Şöbəsinin şəxsi heyətlə iş üzrə rəis köməkçisi, polis polkovnik-leytenantı Anar Həbibzadənin, ŞRPŞ-nin ictimai təhlükəsizlik bölməsinin baş inspektoru, polis mayoru Fazil Bağırovun, polis baş leytenantı Tahir Gənciyevin çıxışlarında şagirdlərlə “narkomaniya”, “erkən nikah”, “dərsdən yayınma” və “intihara yox deyək” mövzularında geniş tərkibli söhbət aparılıb.
Çıxış edənlər vurğulayıblar ki, hazırda bəşəriyyəti düşündürən və narahat edən ən ağrılı problemlərdən biri narkomaniyadır. Yeniyetmə və gənclərin gələcəkdə bu zərərli vərdişə qurşanmaması, fiziki və mənəvi cəhətdən sağlam yetişmələri üçün vaxtaşırı olaraq kollektivlərlə bu cür maarifləndirici görüşlər keçirilir, ağ ölümün səbəb olduğu dəhşətli nəticələr, ölkəmizdə bu ağır bəlaya qarşı aparılan mübarizə haqqında məlumat verilib.
Sonda şagirdlərin iştirakı ilə mövzu ətrafında müzakirələr aparılmış, şagirdlərə zərərli vərdişlərdən uzaq olmaq və idmanla məşğul olmaq tövsiyə edilmişdir.
Tədbirdə 160 şagird iştirak edib.
