Astara rayonunun Ojakəran kəndinin bir hissəsində qazın olmaması yaşayış məntəqəsinin ən böyük problemi sayılır.
Oxu.az xəbər verir ki, 14 il əvvəl kəndin bir hissəsi tam qazlaşdırılsa da, digər hissəsində qaz yoxdur. Belə ki, kəndin bu hissəsində yaşayan təxminən 150 ailə qaz əvəzinə odun, kömür və elektrik enerjisindən istifadə etməyə məcbur qalır ki, bu da əlavə xərc və çətinliklər yaradır. Əslində isə ötürücü ana qaz xətti elə bu yaşayış məntəqəsinin bir addımlığından keçir.
Məsələ ilə əlaqədar "Azəriqaz" İstehsalat Birliyinin sözçüsü Eldəniz Vəliyev bildirib ki, ölkə ərazisində qazlaşma prosesi "Azəriqaz" İB-nin öz resursları, daxili imkanları hesabına həyata keçirilir. Bu səbəbdən işlər mərhələli şəkildə icra olunur. Növbəti mərhələlərdə bu kəndin də qazlaşdırılması prosesi reallaşacaq.
