Astarada “Ailə təsərrüfatlarının, kiçik və orta sahibkarların ABAD Publik Hüquqi Şəxsi ilə birgə fəaliyyətinin təşviqi” mövzusunda tədbir baş tutub. Bu haqda bu gün, 11 fevral tarixində Cenublu.az Astara RİH-yə istinadən xəbər verir.
Tədbirdə şəhər, qəsəbə və kənd inzibati ərazi dairələri üzrə nümayəndələr, bələdiyyələr, idarə, müəssisə, təşkilat rəhbərləri, kiçik və orta sahibkarlar, ailə təsərrüfatı nümayəndələri iştirak ediblər.
Rayon icra hakimiyyəti başçısının müavini, Sosial-iqtisadi inkişafın təhlili və proqnozlaşdırılması şöbəsinin müdiri İlqar Malıyev, Sosial-iqtisadi inkişafın təhlili və proqnozlaşdırılması şöbəsinin müdir müavini Aqil Əhmədov, Masallı Regional "ABAD" Mərkəzinin direktoru Ümid Quliyev, Kiçik və Orta Biznesin İnkişafı Agentliyinin nümayəndəsi, Astara KOB dostu Seymur Murtuzayev, Lənkəran-Astara Regional Məşğulluq filialının Astara rayon xidmət şöbəsinin müdiri Famil Mirzəyev mövzu ilə bağlı çıxışlar ediblər.
Tədbir iştirakçılarına "ABAD" Mərkəzləri şəbəkəsinin fəaliyyət istiqamətləri, göstərdiyi dəstək xidmətləri barədə geniş izahat və ətraflı məlumatlar verilib, o cümlədən tədbir iştirakçılarının fikir və təklifləri dinlənilib, iştirakçılara maraqlı olan suallar dolğun cavablandırılıb.
Görüş Astara rayonunda fəaliyyət göstərən kiçik və orta sahibkarların, eyni zamanda ailə təsərrüfatlarına məxsus olan şəxslərin "ABAD" publik Hüquqi Şəxsi ilə əməkdaşlığının genişləndirilməsinin təşkili, "ABAD" Mərkəzləri tərəfindən göstərilən bir çox xidmətlərin tətbiq dairəsinin genişləndirilməsi və bu sahəyə maraqlı olan hər bir vətəndaşımızın bu xidmətlərdən maksimum dərəcədə yararlana bilməsi məqsədilə təşkil olunub.
Tədbirdə mövzu ilə əlaqədar videoçarx nümayiş etdirilib.
