***
Astara rayonunun Vaqo kəndində yerləşən dəmir-beton körpünün dağılması nəticəsində bir sıra kəndlərin rayon mərkəzi ilə əlaqəsi kəsilib. Bu haqda Astara Rayon İcra Hakimiyyətindən məlumat verilib.
Astara Rayon İcra Hakimiyyətindən verilən məlumata görə, artıq 40 kəndin rayon mərkəzi ilə əlaqəsi kəsilib. Qeyd edilib ki, Züngüləş kəndinin Bəndəsər yaşayış massivində Astara kiçik su elektrik stansiyasının bəndi dağıla bilər. Hazırda su bəndin üst hissəsindən təqribən 2 metr hündürlükdə daşmaqdadır.
Siyəku kənd inzibati ərazi dairəsi üzrə nümayəndəliyin 9400 nəfər əhalisi olan 24 kəndi, Asxanakəran kənd inzibati dairəsi üzrə nümayəndəliyin 2850 nəfər əhalisi olan 10 kəndi, Hamoşam kənd ərazi inzibati dairəsi üzrə nümayəndəliyin 2750 nəfər əhalisi olan 6 kəndi, ümumilikdə 15.000 nəfər əhalinin yaşadığı 40 kəndlə əlaqə kəsilib.
Həmçinin 700 nəfər əhalisi olan Siyakeş kəndində Pensərçay üzərində yerləşən uzunluğu 10, eni 4 metr olan dəmir körpünü sel aparıb.
Taxtanakəran-Toradi avtomobil yolunun 20-ci km-də torpaq sürüşərək 30 metr məsafədə yolu bağlayıb. Kijəbə-Pəlikeş avtomobil yolunun 11-ci km-dən başlayaraq bir neçə hissədə torpaq sürüşmələri baş verib və yol bağlanıb.
Ərçivan çayının daşması nəticəsində qəsəbə ərazisində 200-ə yaxın ev və həyət su altında qalıb.
Şiyəkəran kəndində isə Pensərçayın üzərində yerləşən uzunluğu 42 metr olan və uzunluğu 54 metr olan iki asma körpü də sel nəticəsində uçub.
***
Astara rayonunun Vaqo kəndində körpü sel nəticəsində çöküb. Bu haqda məlumatı Cenublu.az bu gün, 18 sentyabr tarixində verir.
Belə ki, bölgədə güclü yağışlar nəticəsində səhər saat 4:00-5:00 radələrində Vaqo kəndində yerləşən körpünü sel aparıb. Hazırda Astarada 34 kəndin rayon mərkəzi ilə əlaqəsi kəsilib.
Qeyd edək ki, rayonun Şiyəkəran kəndindəki körpü də qəzalı vəziyyətdədir və Cenublu.az bu haqda məlumat verib.
Astara, körpü, Vaqo kəndi
