Astara rayon İcra Hakimiyyətinin başçısı Qəzənfər Ağayev şəhərin Giləkəran yaşayış massivində sakinlərlə səyyar qəbul-görüş keçirib. Bu haqda məlumatı Cenublu.az bu gün, 31 yanvar tarixində verir.
Görüşdə rayonun hüquq-mühafizə orqanlarının, idarə və müəssisələrin rəhbərləri iştirak ediblər.
İlk növbədə rayon icra hakimiyyəti başçısının Astara şəhər inzibati ərazi dairəsi üzrə nümayəndəsi görülən işlər barədə məlumat verib. Bildirilib ki, 17.635 nəfər əhali yaşadığı Astara şəhərində ötən il xeyli quruculuq, abadlıq işləri görülərək bir neçə küçənin yolları asfaltlanıb, küçə və səkilərdə, ictimai yaşayış binalarında təmir işləri aparılıb, müxtəlif təyinatlı yeni bina və obyektlər inşa edilərək əhalinin istifadəsinə verilib.
Qaldırılan məsələlərin həllinə həssaslıqla yanaşdığına görə icra başçısından razılıq edən sakinlər şəhərin Giləkəran ərazisindən keçən avtomobil yolunda piyada xətlərinin rənglənməsi, Giləkəran qəbiristanlığına gedən yolun asfaltlanması və elektrik xəttinin çəkilməsi, içməli su xəttində baş vermiş qəza nəticəsində avtomobil yolunun dağılmış asfalt örtüyünün təmir edilməsi, qəzalı vəziyyətdə olan elektrik dirəyinin dəyişdirilməsi barədə təkliflərini veriblər.
Qəzənfər Ağayev sakinlərin arzu və təkliflərini dinləyərək qaldırılan bir çox məsələlərin həlli ilə əlaqədar idarə, müəssisə rəhbərlərinə tapşırıqlar verib, digərlərinin həlli istiqamətində tədbirlərin müəyyənləşdiriləcəyini bildirib.
