Ermənistanda həbs olunan əsirlər Aqşin Bəbirov və ömürlük həbs cəzası alan, əslən Lənkərandan olan Hüseyn Axundov azad olunacaqlar. Bu haqda məlumatı Cenublu.az bu gün, 8 dekabr tarixində verir.
Belə ki, əldə olunan razılaşmaya əsasən, Azərbaycanın iki əsiri 32 erməni əsiri ilə dəyişdiriləcək.
Əsir Hüseyn Axundovun anası Şəlalə Axundova bildirib ki, dünənki ömürlük həbs xəbərindən sonra bugünkü azad olunma xəbəri onlar üçün gözlənilməz olub:
“Mən bilirdim ki, 30 ildən sonra torpaqlarımızı azad edən Prezident mənim balamı da orada qoymazdı. Ancaq bunun bu qədər tez baş verəcəyinə inanmırdım. Dövlət başçımız çox sağ olsun ki, analara bu sevinci yaşatdı. Prezident İlham Əliyevin yanındayıq və ona arxalanırıq”.
Qeyd edək ki, hər iki əsgərimiz bu ilin aprel ayında Naxçıvan Muxtar Respublikasının Şahbuz rayonunda əlverişsiz hava şəraiti səbəbindən itkin düşmüşdülər. Daha sonra Ermənistan tərəfi onları müxtəlif cinayətlərdə təqsirləndirərək ömürlük azadlıqdan məhrum edib.
