12 noyabr Azərbaycan Respublikasında Konstitusiya Günü kimi qeyd olunur. Müstəqil Azərbaycanın ilk Konstitusiyası 1995-ci il noyabrın 12-də ümumxalq referendumu ilə qəbul edilib.
Dövlətin əsas qanunu həmin ilin noyabrın 27-dən qüvvəyə minib.
1995-ci ildə qəbul edilmiş bu Konstitusiya müstəqil Azərbaycanın ilk, ümumilikdə isə ölkənin dördüncü Konstitusiyasıdır. 1918-1920-ci illərdə mövcud olmuş Azərbaycan Xalq Cümhuriyyəti dövlətin əsas qanununu qəbul etməyə imkan tapmamışdı. Azərbaycan Respublikasının konstitusiya quruluşunun tarixi SSRİ dövrünə dayanır. Azərbaycanın ilk Konstitusiyası 1921-ci il mayın 19-da I Ümumazərbaycan Sovetlər Qurultayında təsdiq edilib. Daha sonra 1925-ci ilin martın 14-də SSRİ Konstitusiyasına uyğunlaşdırılmış yeni mətn IV Ümumazərbaycan Sovetlər Qurultayında qəbul olunub. 1978-ci il aprelin 21-də qəbul edilən Azərbaycan SSR-in son Konstitusiyası da SSRİ Konstitusiyasına uyğun şəkildə tərtib edilib.
Müstəqillik əldə edildikdən sonra yeni Konstitusiyanın hazırlanması zərurəti yaranmışdı. Bununla bağlı Azərbaycan Respublikasının Prezidenti Heydər Əliyevin rəhbərliyi ilə xüsusi komissiya yaradılmış və Konstitusiya layihəsi ümumxalq müzakirəsinə təqdim edilmişdi. 1995-ci il noyabrın 12-də keçirilən referendum nəticəsində müstəqil Azərbaycanın ilk Konstitusiyası qəbul edilib.
Bu Konstitusiya 5 bölmə, 12 fəsil və 158 maddədən ibarətdir. 2002-ci ilin avqustunda, 2009-cu ilin martında və 2016-cı ilin sentyabrında keçirilmiş referendumlarla Konstitusiyaya bir sıra əlavə və dəyişikliklər olunub.
