Tarixçi-etnoqraf, toponomist, yazıçı, jurnalist, pedaqoq - əməkdar müəllim, Azərbaycan Yazıçılar Birliyinin, Azərbaycan Jurnalistlər Birliyinin üzvü Mirzəyev Musarza-Kadusi vəfat edib. Ailəli idi, iki övladı var.
Musarza Oğul oğlu Mirzəyev 1958-ci il martın 4-də Masallı rayonunun Mahmudavar kəndində anadan olub. 1975-ci ildə Mahmudavar kənd tam orta məktəbini, 1979-cu ildə isə ADPU-nun tarix fakültəsini bitirib.
O, Masallı rayonunun Türkoba və Mahmudavar kənd tam orta məktəblərində, Lənkəran Dövlət Universitetində müəllim, Masallı Rayon İcra Hakimiyyəti Başçısının Mahmudavar kənd inzibati ərazi dairəsində nümayəndəsi , "Çağırış", "Yeni qəzet" və "Tolışı sədo" qəzetlərinin xüsusi müxbiri, "Yeni qəzet"in redaktor müavini (1994) vəzifələrində çalışıb.
M.Mirzəyev yaşadığı diyarın tarixi, etnoqrafiyası və toponimləri haqqında bəhs edən 10-dan artıq kitab, 500-ə qədər məqalənin, tarixi etnoqrafik oçerklərin müəllifidir. Onun "Talış toponimlərinin izahlı lüğəti" əsəri Azərbaycan toponimikası tarixində Talış (cənub) bölgəsi üzrə ilk toponimik əsərdir.
Musarza Mirzəyeva 1991-ci ildə "Metodist müəllim", 1995-ci ildə "Ali dərəcəli müəllim" kateqoriyaları verilib, 2011-ci ildə isə "Əməkdar müəllim" fəxri adına layiq görülüb.
Ziya Bünyadov Musarza müəllimi "diplomsuz alim" adlandıraraq yazmışdır: "Elmi dərəcəsi olmayan adi bir kənd müəlliminin tədqiqat əsərini çap etdirməsi, bəzi diplomlu alimlərimizə nümunədir. Eşq olsun belə kənd ziyalısına".
Allah rəhmət eləsin!
