Masallı rayonunun Qızılağac kəndində yeni inşa olunmuş məktəb təhlükəli vəziyyətə düşüb. Bu haqda məlumatı Cenublu.az bu gün, 5 dekabr tarixində Qaynarinfo.az-a istinadən verir.
Belə ki, məktəbdə təhsil alan şagirdlərin valideynlərinin sözlərinə görə, məktəbin qəzalı vəziyyətə düşməsinin səbəbi qazanxanadakı borunun partlamasıdır.
"Məktəbdə 600-dən çox şagird oxuyur. Binanın divarlarında böyük çatlar yaranıb, bir sinif otağından baxanda digər sinif görünür", – deyə valideynlərdən biri qeyd edib.
Rayonun Qızılağac kənd bələdiyyəsinin sədri Şamil Məmmədov bildirib: "Məsələ ilə bağlı Masallı Rayon İcra Hakimiyyətinə və Rayon Təhsil Şöbəsinə məlumat verilib. Hətta məktəbi tikən şirkətə də məlumat çatdırılıb. Onlar məktəbə baxış keçirdikdən sonra qəzanın əsl səbəbi bilinəcək".
Qeyd edək ki, 528 şagird yerlik üçmərtəbəli yeni məktəb binasının açılışı 22 sentyabr 2021-ci il tarixində olub.
