Son günlər sosial şəbəkələrdə Lənkəran rayonunun Təngivan kəndi ərazisində çınqıl-daş karxanasının qanunsuz fəaliyyəti və həmin karxanaya icra başçısı Taleh Qaraşovun himayədarlıq etdiyi ilə bağlı fikirlər səslənir.
Sakinlər öz müraciətlərində bildirirlər ki, sözügedən kəndin Lənkərançay ərazisində daş-çınqılın daşınması səbəbindən böyük çuxurlar əmələ gəlib və bu ərazidə yerləşən evlər üçün ciddi təhlükə yaradıb. Həmçinin sakinlər kənd yolunun dağıldığını da iddia edirlər.
“Bu ərazilərdə bizim pay torpaqlarımız yerləşir. O qədər qazıblar ki, yağış yağan kimi pay torpaqlarımızı sel aparacaq. Çay yatağı darmadağın olub, yaşıllıqlar məhv olunub. Şaiq Həsənovla Kamal Hüseynov əlbir olub kəndimizi yer üzündən silmək istəyirlər. Dəfələrlə müraciət etmişik, lakin səsimizə səs verən olmayıb”, - deyə sakinlər öz müraciətlərində bildiriblər.
Məsələ ilə bağlı Cenublu.az Rvo kənd bələdiyyəsinin sədri Kamal Hüseynovla əlaqə saxlayıb.
Kamal bəy açıqlamasında bildirib ki, karxana pay torpaqlarından xeyli aralı ərazidə fəaliyyət göstərir. “Sakinlərin pay torpağına kim nə edə bilər ki? Qeyd olunan karxana şəxsi mülkiyyətdir. Aidiyyəti qurumlar məsələni araşdırıb. Ekologiya və Təbii Sərvətlər Nazirliyi bu işə baxır”. Həmçinin o əlavə edib ki, kənd sakinlərinin gediş-gəlişi məhdudlaşmayıb və kənd yollarına heç bir zərər dəyməyib.
Apardığımız araşdırma nəticəsində karxananın “PROFCO” MMC-yə və onun sahibi Şaiq Həsənova məxsus olduğu məlum olub. Bəs o zaman bu məsələdə Lənkəran şəhər İcra Hakimiyyətinin başçısı Taleh Qaraşovun adı niyə bu şirkəti himayə etməsi məsələsində hallanır?
Bu sualla Lənkəran şəhər İcra Hakimiyyətinə müraicət etdik. Verdikləri cavab isə belə oldu:
“Lənkəran çayının Təngivan kəndi ərazisində “PROFCO” MMC tərəfindən aparılan qazıntılarla bağlı bildiririk ki, Şaiq Həsənova məxsus “PROFCO” MMC karxana fəaliyyəti ilə məşğul olur. Şirkət Lənkəran çayının məcrasının kənarında yerləşən sözügedən əkinə yararsız daşlıq torpaq sahəsini Rvo bələdiyyəsindən icarə qaydasında götürməklə 2014-cü ildən fasilələrlə fəaliyyət göstərir. Karxananın ərazisi ümumilikdə 7,0 ha sahəni əhatə edir və müvafiq sənədləri var.
Bildiririk ki, Lənkəran Şəhər İcra Hakimiyyəti Lənkəran çayının yatağında karxana fəaliyyəti ilə məşğul olmaqdan ötrü “PROFCO” MMC-yə torpaq sahəsi ayırmamışdır. Bir daha qeyd edirik ki, Lənkəran ŞİH-nin başçısının sözügedən şirkəti himayə etməsi ilə bağlı səsləndirilən iddialar əsassızdır.
Məlumat üçün qeyd edirik ki, karxanaların fəaliyyətinə Ekologiya və Təbii Sərvətlər Nazirliyi nəzarət edir, aidiyyəti üzrə müraciət etməyiniz tövsiyə olunur” - deyə Lənkəran ŞİH-nin başçısının köməkçisi Elnur Hüseynov bildirib.
View this post on Instagram
