SON XƏBƏRLƏR

Lənkəran rayonunun Haftoni kəndi ərazisində meşə qoynunda yerləşən “İbadi istisu” qaynağı uzun illərdir yerli sakinlər tərəfindən müalicə məqsədilə istifadə olunur. Bununla bağlı Cenublu.az bu gün, 15 avqust tarixində Azertac-a istinadən məlumat verir.

Şəhər mərkəzindən 14.5 kilometr aralıda, Talış dağlarının ətəyində yerləşən müalicəvi isti su yerin tərkibindən təbii halda çıxaraq axır. Aparılmış elmi araşdırmalar nəticəsində suyun tərkibinin bir çox insan xəstəlikləri üçün müalicəvi əhəmiyyətə malik olduğu müəyyənləşib.

“İbadi istisu” qaynağı haqqında məlumatlara hətta şifahi xalq ədəbiyyatında da rast gəlinir. Bir əfsanəyə görə, ağır xəstəliyə tutulmuş İbadulla adlı şəxs bu yerdə məskunlaşıb və şəfalı suyun “sehrli” gücü vasitəsilə sağalıb. O vaxtdan bu su mənbəyi onun ilk ziyarətçisinin adı ilə adlandırılıb.

“İbadi istisu” ərazidəki tikililərin içindəki hovuzlara ötürülür. Burada suyun istiliyi 42 dərəcəyə çatır. Buna görə də suda 10-15 dəqiqədən artıq qalmaq məsləhət deyil. Bu su ürək, qan-damar, sinir, oynaq, dəri xəstəliklərinin müalicəsində faydalıdır.