Lənkəran rayonunun mərkəzi bazarında yerli istehsal müxtəlif növ çayların satışı geniş yer tutur. Burada çayın qiyməti çeşidinə və keyfiyyətinə görə dəyişir, kiloqramı 15 manatdan başlayaraq 450 manata qədər dəyişir. Satıcıların sözlərinə görə, daha sərfəli 15-25 manat aralığında olan çaylara alıcı marağı daha yüksəkdir.
Yerli çayın baha satılması sosial şəbəkədə müzakirə mövzusuna çevrilib.
Modern.az-a açıqlamasında iqtisadçı ekspert Xalid Kərimli bildirib ki, yerli istehsal olması həmin məhsulun mütləq şəkildə daha ucuz qiymətə satılması anlamına gəlmir:
“Sahibkar öz məhsulunun qiymətini bazar prinsiplərinə uyğun şəkildə sərbəst müəyyənləşdirə bilər.
Əgər sahibkar məhsulunu 400-500 manata sata bilirsə, bu, iqtisadi baxımdan müsbət haldır. Bu həm də cəmiyyət üçün sevindirici olmalıdır ki, yerli istehsal olunan məhsula belə dəyər verən və almağa imkanı çatan vətəndaşlarımız var”.
X.Kərimli qeyd edib ki, bazarda vətəndaşların daha münasib qiymətə çay almaq imkanı da mövcuddur:
“Çünki ölkəyə Hindistan, Çin, Şri-Lanka kimi çay ixracatçısı olan ölkələrdən idxal olunan müxtəlif növ məhsullar gətirilir. Yerli istehsalçılar isə bu bazarın cüzi bir hissəsini təşkil edirlər və onların satdığı 3-5 kiloqramlıq çay ümumi bazar qiymətlərinə ciddi təsir göstərmir”.
Ekspertin sözlərinə görə, çay sahəsində inhisarçılıq mövcud deyil və bu sektorda monopoliya halları müşahidə olunmur.
Əsas şərt ondan ibarətdir ki, bazarda satılan bütün çay məhsulları dövlət tərəfindən keyfiyyətə nəzarət baxımından yoxlanılır və insan sağlamlığı üçün təhlükə daşımır. Sahibkar baha qiymət təyin edirsə, bu onun sərbəst qərarıdır və bazar iqtisadiyyatının qaydalarına uyğundur. Əsas odur ki, istehlakçı seçim imkanına malikdir və istədiyi halda daha münasib qiymətə çay ala bilər",- deyə o əlavə edib”.
