Müsavat partiyasının Məclis üzvləri Ələddin Ələsgərli, Qoşqar Nuralı və partiya fəalı Cabir Vəliyev barəsində çıxarılmış hökmə kassasiya şikayəti verilib. Şikayət Ali Məhkəmədə araşdırılacaq.
Onlar Müsavat partiyasının Biləsuvar rayon təşkilatının üzvləridir və Biləsuvarda restoranda ofisiantı döyməkdə təqsirləndirilirlər.
İttihama əsasən, partiya rayon təşkilatı restoranlardan birində məclis təşkil edib. Məclis zamanı Orxan adlı ofisiant qonaqlara xidmət göstərib. Tədbirin sonunda Ələddin Ələsgərli ofisiantın xidmətindən narazı qalaraq restoran rəhbərliyinə şikayət edib və nəticədə Orxanın maaşından tutulma edilib.
Buna etiraz edən Orxan Ələddin Ələsgərliyə iradını bildirib. Bundan sonra Ələddin Ələsgərli, Qoşqar Nuralı və Cabir Vəliyev birləşərək ofisiantı döyüblər və ona xəsarətlər yetiriblər.
Faktla bağlı açılmış cinayət işi üzrə Biləsuvar Rayon Məhkəməsinin hökmü ilə Ələddin Ələsgərli və Cabir Vəliyev 2 il 3 ay, Qoşqar Nuralı isə 2 il azadlıqdan məhrum edilib və onlar məhkəmə zalında həbs olunublar.
