Masallı rayonunda qardaşlar arasında yaranan mübahisə məhkəmə ilə nəticələnib.
Belə ki, rayonun kəndlərindən birində 1991-ci il təvəllüdlü Ələkbər qardaşı Kərəmə xəsarət yetirib.
Hadisə gecə saatlarında baş verib. İttihama görə, Ələkbər mübahisə zamanı qardaşının sifət nahiyəsinə bir neçə dəfə yumruqla zərbə vurub.
Təqsirləndirilən şəxs məhkəmədə bildirib ki, sərxoş vəziyyətdə evə qayıdarkən əlində olan beton dağıdan aparat ehtiyatsızlıqdan pəncərəyə dəyib və şüşə sınıb. Bu zaman qolundan yaralandığını, səsə gələn qardaşı ilə aralarında mübahisə yarandığını deyib. Onun sözlərinə görə, Kərəmi yalnız itələyib və xəsarəti qəsdən yetirməyib.
Zərərçəkmiş Kərəm isə ifadəsində bildirib ki, şüşənin sınması səsinə oyanaraq həyətə çıxıb və səbəbi soruşarkən qardaşı tərəfindən yumruqlanıb.
Masallı Rayon Məhkəməsinin hökmü ilə Ələkbər Cinayət Məcəlləsinin 128-ci maddəsi ilə təqsirli bilinərək 1000 manat məbləğində cərimə edilib.
