Yardımlı rayonunda 1989-cu il təvəllüdlü Fərid qayınatası Elmana xəsarət yetirib.
Hadisə rayonun kəndlərindən birində baş verib. Aralarında əvvəldən narazılıq olan Fərid qayınatasını kənddəki marketin qarşısında görərək ona hücum edib. O, yerdən ovuc böyüklüyündə daş götürərək sellofan torbaya büküb və Elmanın başının arxasına bir zərbə endirib. Daha sonra sağ yumruqla onun göz nahiyəsinə vurub.
Fərid ifadəsində bildirib ki, hadisədən əvvəl atası Məhəmmədin üzünün qızardığını görüb. Atası ona qayınatasının qardaşı Vüsalın şillə vurduğunu deyib. Bu səbəbdən əsəbiləşən Fərid 2025-ci il aprelin 26-da günorta saatlarında evdən çıxaraq kəndin mərkəzinə gedib və qarşılaşdığı qayınatasına hücum edib.
Onun barəsində qəsdən sağlamlığa zərər vurma maddəsi ilə ittiham irəli sürülüb və o, təqsirini etiraf edib.
İşə Yevlax Rayon Məhkəməsində baxılıb. Məhkəmədə tərəflər arasında barışıq əldə olunduğu üçün zərərçəkmiş şikayətini geri götürüb. Qərara əsasən, təqsirləndirilən şəxs cinayət məsuliyyətindən azad olunub və iş üzrə icraata xitam verilib.
Qeyd edək ki, adlar şərtidir.
