Martın 6-da Masallı rayonunun kəndlərindən birində məişət zorakılığı baş verib. 1985-ci il təvəllüdlü Camal qayınatası Mustafaya məxsus fərdi yaşayış evində həyat yoldaşı Gülnarə ilə mübahisə edib.
Münaqişəyə qadının bir neçə gün əvvəl inciyərək atası evinə getməsi səbəb olub. Həyat yoldaşı ilə barışmaq istəyən kişi onu öz evlərinə aparmağa çalışıb. Lakin qadın geri qayıtmaqdan imtina edib. Tərəflər arasında yaranan mübahisə zamanı Camal arvadını yumruq və təpiklə döyərək ona müxtəlif dərəcəli xəsarətlər yetirib.
Faktla bağlı Camala qarşı Cinayət Məcəlləsinin sağlamlığa qəsdən yüngül zərər vurma maddəsi ilə ittiham irəli sürülüb.
Təqsirləndirilən şəxs ifadəsində əməlindən peşman olduğunu bildirib. O, həyat yoldaşı ilə barışdığını və qadının ondan şikayətçi olmadığını qeyd edib.
Masallı Rayon Məhkəməsi tərəflərin barışmasını əsas götürərək cinayət təqibinə xitam verib. Beləliklə, Camal cinayət məsuliyyətindən azad edilib.
Mənbə: Demokrat.аz
