Şirvan Apellyasiya Məhkəməsində qəsdən adam öldürməyə cəhddə təqsirləndirilən Eldar Budaqovun barəsindəki hökmdən verilən apellyasiya şikayətinə baxılıb. Hakim Pərviz Hacıyevin sədrliyi ilə keçirilən iclasda qərar elan olunub və şikayət təmin edilməyib.
İttihama görə, hadisə 27 fevral 2025-ci il tarixdə, səhər saat 09 radələrində Masallı rayonu ərazisində baş verib. Eldar Budaqov həyat yoldaşı Səma Budaqovanı ona xəyanət etməkdə şübhəli bilərək öldürmək qərarına gəlib. O, özünə məxsus fərdi yaşayış evində həyat yoldaşı ilə mübahisə edib və mətbəx bıçağı ilə ona hücum edib.
Təqsirləndirilən şəxs övladlarının gözü qarşısında qadının bədəninin müxtəlif nahiyələrinə ardıcıl bıçaq zərbələri endirib. Zərərçəkmiş aldığı ağır xəsarətlər səbəbindən öləcəyini bildirərək ondan aman diləsə də, o, hücumlarını dayandırmayıb və xüsusi amansızlıq nümayiş etdirib.
Hadisə zamanı qızı Mina Budaqova atasının əməlini dayandırmağa çalışıb. Lakin o da bıçaq xəsarəti alıb və bu, sağlamlığın qısa müddətə pozulmasına səbəb olan yüngül xəsarət kimi qiymətləndirilib.
Daha sonra Eldar hadisə yerini tərk edib. Ana və qızı yaxınlarının köməyi ilə xəstəxanaya çatdırılıb və göstərilən tibbi yardım nəticəsində Səmanın həyatı xilas edilib.
Lənkəran Ağır Cinayətlər Məhkəməsinin hökmü ilə Eldar Budaqov 11 il 6 ay müddətinə azadlıqdan məhrum edilib. Apellyasiya instansiyası isə bu hökmü qüvvədə saxlayıb.
Qeyd edək ki, adlar şərtidir.
