1997-ci il təvəllüdlü Lerik sakini Azər sevgi münasibətində olduğu Aydanı öldürməyə cəhd edib.
Hadisə 2024-cü il noyabrın 22-də Goranboy rayonun Nərimanlı kəndi ərazisində baş verib. Azər saat 12:30 radələrində özünə məxsus avtomobillə qeyri-rəsmi münasibətdə olduğu Aydanı işlədiyi Goran qəsəbəsindəki çay evinə apararkən yolda aralarında mübahisə yaranıb.
Azər avtomobili yolun kənarında saxlayıb və mübahisə gərginləşdiyi üçün Aydanı öldürmək qərarına gəlib. O, avtomobilin qolaltı saxlanc yerində saxladığı mətbəx bıçağını götürərək qadının baş, boyun, çiyin və kürək nahiyələrinə çoxsaylı zərbələr vurub.
Aydan ağır yaralansa da, həyatı xilas edilib. Azərə Cinayət Məcəlləsinin 29 və 120.2.4-cü maddələri ilə ittiham elan olunub.
Zərərçəkmiş qadın bildirib ki, Azərlə 6-7 ay əvvəl tanış olub. Onun evlənmək istəyini qəbul etmədikdən sonra Azər tez-tez mübahisə edib və ayrılacağı təqdirdə onu öldürəcəyi ilə hədələyib. Hadisə günü isə birlikdə polis şöbəsindən qayıdarkən mübahisə yenidən başlayıb və Azər bıçaqla ona hücum edib. Qadın avtomobildən düşərək qaçmağa çalışsa da, Azər avtomobillə onu vuraraq yoldan kənara atıb.
Təqsirləndirilən şəxsin valideyni məhkəmədə bildirib ki, Azər uşaq vaxtı başından xəsarət aldıqdan sonra qıcolmalar keçirib və dəfələrlə psixiatriya müəssisələrində müalicə olunub.
Gəncə Ağır Cinayətlər Məhkəməsinin hökmü ilə Azər əməli anlaqsız vəziyyətdə törətdiyi üçün cinayət məsuliyyətindən azad edilib. Onun barəsində ixtisaslaşdırılmış psixiatriya stasionarında məcburi müalicə tədbiri tətbiq olunub. Müalicə Səhiyyə Nazirliyinin 1 nömrəli Respublika Psixiatriya Xəstəxanasında aparılacaq.
Qeyd edək ki, adlar şərtidir.
