Biləsuvarda alverçilər arasında dava olub.
Hadisə Ələt-Astara magistralının rayonun Xırmandalı kəndindən keçən hissəsində qeydə alınıb.
İttiham aktına görə, 27 yaşlı kənd sakini Murad Bağırov mübahisə zamanı onunla birgə ev quşu satan digər şəxsi döyüb.
Məlumata görə, onlar yol kənarında ev quşları sataraq qazanc əldə edirmişlər. Hadisə baş verən günü bir müştəri avtomobillə Murada yaxınlaşaraq qaz almaq istəyib. Lakin həmkəndlisi olan digər şəxs onun alver etməsinə mane olub. Nəticədə həmkəndlilər arasında mübahisə düşüb. Mübahisə zamanı Murad həmkəndlisini yumruq və təpik zərbələri ilə döyərək xəsarətlər yetirib.
Faktla bağlı Murad saxlanılıb və barəsində cinayət işi açılıb.
Təqsirləndirilən şəxs ifadəsində zərərçəkənlə barışdığını və əməlindən peşman olduğunu deyərək, barəsində yüngül cəza verilməsini xahiş edib.
Zərərçəkən şəxs də həmçinin Murada qarşı şikayət və tələbinin olmadığını deyib.
Məhkəmənin qərarı ilə Murad Bağırov 6 ay müddətinə azadlığın məhdudlaşdırılması cəzasına məhkum edilib.
Qeyd edək ki, ad və soyad şərtidir.
