Saatlıda intensiv və superintensiv meyvə bağlarının sahəsi genişlənir. Bu istiqamətdə görülən işlər "Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026–2030-cu illər üçün Dövlət Proqramı"nda müəyyənləşdirilən hədəflərə də uyğundur. Dövlət Proqramında müasir bağçılığın genişləndirilməsi, ixracyönümlü məhsul istehsalının artırılması, fermerlərə subsidiya və digər dəstək mexanizmlərinin tətbiqi əsas prioritetlərdən biri kimi müəyyən olunub.
Saatlıda salınan yeni intensiv və superintensiv bağlar da bu görülən işlərin uğurlu nəticələrindəndir. Bunun bariz nümunələrindən biri də rayonda ilk məhsulunu verən superintensiv armud bağıdır. Bağ sahibi Ələsgər Əhmədov bildirib ki, 2023-cü ildə salınan superintensiv armud bağı 8 hektar ərazini əhatə edir. Bağın hər hektarında 3500 ağac əkilib. Növbəti illərdə isə bağın sahəsinin daha da genişləndirilməsi nəzərdə tutulur.
"İlk məhsul ilindəyik. Hər ağacdan orta hesabla 3-4 kiloqram meyvə toplanılır. Bu günə kimi 40 ton məhsul yığmışıq. Məhsulun bir hissəsi artıq Rusiya bazarına göndərilib. Əsas hədəfimiz hər hektardan 60 ton məhsul götürmək və Avropa bazarlarına çıxmaqdır.
Bağ növbəti illərdə daha çox məhsul verəcək. Çünki ağaclar hazırda inkişaf mərhələsindədir və məhsuldarlıq ildən-ilə artacaq. Təbii ki, bu işlərin ərsəyə gəlməsində dövlət dəstəyinin mühüm rolu var. Müxtəlif güzəştlər və subsidiyalar kənd təsərrüfatının inkişafına birbaşa dəstək verir. Bu bağın salınmasına görə hər hektara birdəfəlik 3500 manat subsidiya ayrılıb. Sonrakı üç il ərzində hər hektara 742 manat subsidiya verilir. Daha sonra isə daimi olaraq hər hektara 240 manat subsidiya ödənilir.
Fermer olaraq dövlətin bizə göstərdiyi dəstəkdən yararlanaraq qarşımıza qoyduğumuz məqsədlərə çatmağı hədəfləyirik. 2026–2030-cu illəri əhatə edən Dövlət Proqramında da kənd təsərrüfatının inkişafı üçün bir çox güzəştlər və dəstək mexanizmləri nəzərdə tutulub. Əsas məqsəd idxaldan asılılığı azaltmaq, ixracyönümlü kənd təsərrüfatı istehsalını genişləndirməkdir. Bizim bağların məhsulu daxili bazarla yanaşı ixrac da olunur. Armud və heyva bağlarımızın məhsulu artıq 6 ölkəyə göndərilir. Gələcəkdə həm ixracın, həm də məhsul istehsalının həcmini daha da artırmağı planlaşdırırıq. Bu ilin dekabr ayında isə əlavə 30 hektar sahədə nar bağlarının salınmasını nəzərdə tuturuq", - deyə Ə. Əhmədov bildirib.
Mənbə: azertag.аz
