Masallıda kənd təsərrüfatı məhsullarının istehsal faizi artıb. Bu haqda məlumatı Cenublu.az bu gün, 1 avqust tarixində verir.
Masallı Rayon Statistika İdarəsindən verilən məlumata əsasən, 2022-ci ilin yanvar-iyun aylarının 2021-ci ilin müvafiq dövrü ilə müqayisədə kənd təsərrüfatı məhsullarının istehsalı üzrə 23,9 faiz, o cümlədən bitkiçilik məhsulları üzrə 31,8 faiz, heyvandarlıq məhsulları üzrə isə 12,7 faiz artım olub.
2022-ci ilin yanvar-iyun aylarında heyvandarlıq bölməsində diri çəkidə 3629,2 ton ət, 26.256,1 ton süd, 36.784 min ədəd yumurta, 144,2 ton yun istehsal edilib. Ötən ilə nisbətən yumurta istehsalı 174 min ədəd, ət istehsalı 20 ton, süd istehsalı 265,1 ton, yun istehsalı isə 1,2 ton artıb.
Qeyd edək ki, 2022-ci ilin yanvar-iyun ayları ərzində kənd təsərrüfatının ümumi məhsulunun faktiki qiymətlərlə dəyəri 126,9 milyon manat təşkil edib. Onun 79,3 milyon manatı bitkiçilik, 47,6 milyon manatı isə heyvandarlıq məhsullarının payına düşür.
