Lənkəranda qırmızı soğan əkini ilə məşğul olan Xolmili, Seydəkəran, Göyşaban və Ürgə fermerləri bu il bol məhsul yetişdiriblər. Bu haqda məlumatı Cenublu.az bu gün, 3 avqust tarixində ARB Cenub-a istinadən verir.
Bu kəndlərin torpaqlarında soğan daha məhsuldar, dadlı olur. 10-15 sot torpaq sahəsindən 1,5-2 ton soğan əldə edilir. Qırmızı soğanın üstünlüyü həm də ondadır ki, bir ilədək çürümədən saxlamaq olur.
Qabığı nazik olan qırmızı soğandan, əsasən Cənub mətbəxinin ləziz təamlarından olan ləvəngi, toyuq və balığın hazırlanmasında istifadə olunur.
Soğanı ilə məhşur olan Ürgə kəndi Ələt-Astara yolunun üstündə yerləşdiyindən, sakinlər yetişdirdikləri soğanı elə yolun kənarında satırlar. Bu, onlara məhsullarını tez və sərfəli qiymətə satmağa imkan verir.
Mütəxəssislərin fikrinə görə, qırmızı soğan ağ soğandan daha faydalıdır, tərkibində, ağ soğanla müqayisədə, iki dəfə çox antioksidant maddələri var. Bu isə qırmızı soğanın iltihab əleyhinə güclü təsirini təmin edir.
