Ölkə ərazisində bir neçə gün əvvəl yağan intensiv qarın ardından havaların mülayimləşməsi və temperaturun yüksəlməsi qarın sürətlə əriməsinə səbəb olub.
Cenublu.az xəbər verir ki, nəticədə çaylarda sululuq artıb. Məlumata görə, Cəlilabad rayonu ərazisindən keçən Mişarçayda axşam saatlarından etibarən su səviyyəsi kəskin yüksəlib və sel müşahidə olunub.
Çay üzərində yerləşən su anbarlarında suyun həcmi maksimum həddə çatdığından artıq suların çayın məcrasına yönləndirilməsi həyata keçirilir.
Hazırda sahilboyu ərazilərdə vəziyyət nəzarətdə saxlanılır. Əlaqədar qurumların əməkdaşları tərəfindən monitorinq aparılır, mümkün risklərin qarşısının alınması istiqamətində zəruri tədbirlər görülür.
Sakinlərə çay kənarına yaxınlaşmamaq və təhlükəsizlik qaydalarına ciddi əməl etmək tövsiyə olunur.
