Əlverişsiz hava şəraitinə görə Biləsuvar fermerlərinin yetişdirdikləri pomidor sahələrdə qalaraq çürüyüb.
Cenublu.az-ın verdiyi xəbərə görə, bu il Biləsuvarda fermerlər bol pomidor məhsulu yetişdirsələr də, iqlim şəraitindən, eləcə də təsərrüfatlarda yaranan xəstəlik səbəbindən məhsul sahələrdə yararsız hala düşüb.
Biləsuvarda hər il mövsümi olaraq açıq sahələrdə 2000 hektara qədər müxtəlif tərəvəz bitkiləri yetişdirilir. Builki yazlıq tərəvəz bitkilərinin 670 hektarını pomidor məhsulu təşkil edib. Ötən aydan yığımına başlanılan pomidor bu mövsüm sahələrdə bol olsa da, əlverişsiz hava şəraiti və sahələrdə yayılan xəstəlik becərilən məhsulun elə sahələrdə də çürüməsinə səbəb olub.
Rayonun Səmədabad kənd sakini fermer İlham Ağayev 24 ildir ki, pomidor məhsulunun yetişdirilməsi ilə məşğuldur. O deyir ki, 1 hektar sahədə pomidorun Niderland mənşəli toxumun Lojin sortundan 15 min ədəd şitil əkib. Bu sortdan gözləntilər çox olsa da, nəticə ürəkaçan olmayıb: “Müxtəlif mərhələlərlə sahədən hektardan 12 dəfəyədək məhsul götürürdük. Bu da sortun öz təlimatında göstərildiyi kimi 120 ton məhsul verməyə qadir olan bir sortdur. Amma bu il gözləntilərimiz doğrulmadı. Avqust ayının axırında iqlim şəraitinə görə məhsulumuza xəstəlik düşdü. Çoxlu preparatlardan istifadə etdik, lakin nəticə əldə edə bilmədik. Kollarda pomidor çoxdur, amma pomidora xəstəlik düşdüyü üçün biz o məhsulu götürə bilmədik”.
Fermerlər bu ilin əvvəlindən pomidor sahəsinə zəruri aqrotexniki qulluqlar göstərməsinə baxmayaraq, dərman preparatlarının keyfiyyətsizliyi üzündən hər yığımda, demək olar ki, 50 faiz zərərlə üzləşiblər.
Biləsuvar Dövlət Aqrar İnkişaf Mərkəzlərinin bitkiçilik sektorunun baş məsləhətçisi Gülağa Qurbanov bildirib ki, mərkəz tərəfindən sahələrdə mütəmadi olaraq monitorinqlər keçirilir və xəstəliklərə qarşı mübarizə aparmaq üçün tövsiyələr verilir: “Havaların bir az yağıntılı keçməsi ilə əlaqədar göbələk xəstəlikləri rütubətə həssas olduqları üçün bəzi sahələrdə artıb. Biz fermerlərə bu xəstəliklərə qarşı mübarizə tövsiyələrimizi vermişik və onlar bu problemin qarşısından layiqincə gəliblər”.
Qeyd edək ki, pomidorun yetişdirilməsi ilə əsasən, Biləsuvar rayonunun Ağalıkənd, Səmədabad, Ağayrı, Günəşli kəndlərində məşğul olurlar. Bu günədək sahələrdən tədarük olunan 38 min tondan çox məhsulun 70 faizi paytaxt və region bazarlarına çıxarılıb. Məhsuldarlığın isə 400-500 sentner civarında olması planlaşdırılır.
