Xəbər verdiyimiz kimi, Masallının fəxri, Azərbaycan Respublikası Milli Paralimpiya Komitəsinin boccia idman növü üzrə milli komandanın üzvü Bəhruz Mirzəyev Polşanın Poznen şəhərində keçirilən “World Challenge" kubokunda qızıl medala sahib olub. Bəs biz bayrağımızı daim dalğalandıran paralimpiyaçımızı nə qədər yaxşı tanıyırıq?
Cenublu.az Bəhruz Mizəyevin həyatı və idman karyerası haqda məlumatı izləyiciləri ilə bölüşür.
Bəhruz Şakir oğlu Mirzəyev 8 aprel 1988-ci ildə Masallı rayonunun Viləş kəndində anadan olub. O, şəhid Seyran Hacıyev adına Viləş kənd tam orta məktəbinin 9-cu sinfini bitirib. Səhhətində problemlər 17-18 yaşında yaranmağa başlayır. Artıq 26-27 yaşlarında əlil arabasına oturmağa məcbur qalır. O, əzələ distrofiyası, miopatiya xəstəliyindən əziyyət çəkir. Əfsuslar olsun ki, idmançımızın düçar olduğu bu xəstəliyin müalicəsi yoxdur.
2016-cı ildə Bəhruz 1 saylı Sağlamlıq imkanları məhdud gənclərin Peşə Reabilitasiya Mərkəzinə gedir və orada dostundan boccia idman növü haqda məlumat alır. Daha sonra Birinci Qarabağ Müharibəsi əlili olan baş məşqçi İlham Məhərrəmovla tanış olur və beləliklə, boccia ilə məşğul olmağa başlayır.
2017-ci ildə Azərbaycanda keçirilən Türkiyənin milli komandası ilə yoldaşlıq görüşündə bürünc medala sahib olub. 2018-ci ilin mart ayından Leyla Əliyevanın təşəbbüsü ilə Boccia İdman Federasiyasının yarandığı ilk gündən federasiyaya qoşulub.
İkiqat Azərbaycan çempionu olan paralimpiyaçımız İspaniyanın Madrid şəhərində keçirilən açıq regional çempionatda 20 illik təcrübəyə malik oyunçuları məğlub edib. İtaliyanın Olbiya şəhərində 15 Avropa komandası arasında təşkil olunan yarışlarda qızıl medala layiq görülüb.
Boccia üzrə İtaliyada keçirilən beynəlxalq səviyyəli açıq regional turnirdə (21-28 oktyabr 2018-ci il) BC 4 kateqoriyasında, Tel-Əviv şəhərində keçirilən İsrail açıq çempionatında (18-23 dekabr 2018-ci il), Xorvatiyanın Zaqreb şəhərində keçirilən “Intercontinental Challenger” (qitələrarası) çempionatında (02-08 aprel 2022-ci il) o, ölkəmizə qızıl medal qazandırıb.
Bəhruz Mirzəyev 2018-ci ildə boccia idman növü üzrə ilin ən yaxşı paralimpiyaçısı adına layiq görülüb.
