Həndbol üzrə zona birincisi olan Cəlilabad məktəbliləri ilə görüş keçirilib. Bu haqda bu gün, 29 mart tarixində Cenublu.az Cəlilabad Rayon Gənclər və İdman İdarəsinə istinadən xəbər verir.
Tədbirdə Cəlilabad rayon Gənclər və İdman idarəsinin rəisi Elçin Hüseynov, Lənkəran-Astara Regional Təhsil İdarəsinin Cəlilabad sektorunun müdiri İlkin Zeynalov və ATİAHİ-nin Cəlilabad komitəsinin sədri Nəbi İsgəndərov iştirak ediblər. Çıxış edənlər qələbə münasibətilə komanda üzvlərini təbrik edərək gələcək yarışlarda uğurlar arzulayıblar. Sonra komandanın respublika final mərhələsinə hazırlıq prosesi ilə tanışlıq olub, heyətə uğurlar arzulanıb.
Komanda üzvləri və məşqçilər diplomlarla təltif ediliblər.
Qeyd edək ki, martın 23-də Gənclər və İdman Nazirliyi və Azərbaycan Həndbol Federasiyasının təşkilatçılığı ilə Lənkəran Olimpiya İdman Kompleksində həndbol üzrə 14-15 yaşlı oğlanlar arasında növbəti zona yarışı keçirilib.
Zona yarışında Lənkəran, Cəlilabad, Yardımlı və Biləsuvar rayonlarının məktəblilərindən ibarət komandaları iştirak edib.
Yarışın yekun nəticəsinə görə, Cəlilabad həndbol komandası qalib gəlib və iyun ayında Bakıda keçiriləcək Azərbaycan birinciliyinin final mərhələsinə vəsiqə qazanıb.
Yarışda Cəlilabad həndbol komandasının heyəti Cəlilabad şəhər 9 nömrəli tam orta məktəbin şagirdlərindən ibarət olub. Məşqçi-müəllimlər Tofiq Mahmudov və Murad Zeynalovdur.
