Masallının fəxri veteran cüdoçular arasında cüdo üzrə Azərbaycan çempionatında qızıl medal qazanıb. Bu haqda bu gün, 25 fevral tarixində Cenublu.az Masallı Rayon Gənclər və İdman İdarəsinə istinadən xəbər verir.
Hövsan qəsəbəsində yerləşən Fövqəladə Hallar Nazirliyinin (FHN) İdman Sağlamlıq Mərkəzində keçirilən ölkə çempionatı Azərbaycan Respublikası Gənclər və İdman Nazirliyinin və Azərbaycan Cüdo Federasiyasının birgə təşkilatçılığı ilə baş tutub.
Yarışda 3 yaş kateqoriyası üzrə 19 çəki dərəcəsində 88 cüdoçu medallar uğrunda mübarizə aparıb. Masallı cüdo məktəbinin yetirməsi Hikmət Alışov (-100 kq) M1 yaş kateqoriyası üzrə qızıl medalın sahibi olub.
Yarışın keçirilməsində məqsəd usta cüdoçuların veteran cüdoçulardan ibarət yığma komandaya cəlb olunması, gənc nəslə örnək olaraq sağlam həyat tərzinin təbliği, təcrübəli idmançıların bacarıqlarının reallaşdırılması və eyni zamanda müvafiq yaş qrupu üzrə Avropa və dünya çempionatlarında iştirak üçün seçim etməkdir.
Alışov Hikmət Əzizağa oğlu 4 iyun 1992-ci ildə Masallı şəhərində anadan olub. Orta təhsilini Masallı şəhər 1 saylı orta məktəbində alıb. 2009-cu ildə Bolqarıstan Respublikasında keçirilən sambo üzrə dünya çempionatıda (98 kq) gümüş, 2011-ci ildə Ukrayna Respublikasının Kiyev şəhərində keçirilən cüdo üzrə Avropa kubokunda (90 kq) və 2012-ci ildə Rumuniya Respublikasında keçirilən cüdo üzrə Avropa çempionatında (90 kq) bürünc medal qazanıb.
Cüdo və sambo üzrə idman ustası, polis baş leytenantı Hikmət Alışov Daxili İşlər Nazirliyinin Polis Akademiyasının Fiziki hazırlıq kafedrasının müəllimidir.
