Masallı Olimpiya Kompleksində Müstəqillik Gününə həsr olunmuş Spartakiadanın açılış tədbiri baş tutub. Bu haqda məlumatı Cenublu.az bu gün, 24 may tarixində verir.
Açılış mərasiminə Masallı RİH-nin başçısı Araz Əhmədov, əməkdaşları, Lənkəran-Astara Regional Gənclər və İdman İdarəsinin rəisi Teymur Babazadə və idarənin əməkdaşları, müəssisə və təşkilatların rəhbərləri, idmançılar, gənclər, regionun idman ictimaiyyətinin nümayəndələri cəlb olunublar.
Qeyd edilib ki, Spartakiada çərçivəsində minifutbol, voleybol, sərbəst və yunan-Roma güləşi, stolüstü tennis, atletika, həndbol, boks və ağırlıqqaldırma idman növləri üzrə yarışlar keçiriləcək.
Daha sonra “Kontakt karate” idman klubunun üzvləri tərəfindən nümuməvi çıxışlar göstərilib və Masallı rayon Mədəniyyət Mərkəzinin “Halay” rəqs qrupunun ifasında rəqs nömrələri təqdim olunub.
Yekunda may ayının 23-də keçirilmiş idman yarışlarında yer tutan komandalar Lənkəran-Astara Regional Gənclər və İdman İdarəsinin diplom və medalları ilə təltif edilib.
Tədbir Masallı Rayon İcra Hakimiyyəti, Lənkəran-Astara Regional Gənclər və İdman İdarəsinin birgə təşkilatçılığı ilə həyata keçirilib.
