Masallıda cüdo turniri baş tutub. Bu haqda məlumatı Cenublu.az bu gün, 22 iyun tarixində verir.
Uşaq və yeniyetmələr arasında keçirilən rayon Açıq turniri şəhidlərin xatirəsinə həsr olunub. Yarış Masallı Rayon Gənclər və İdman idarəsi tərəfindən, Azərbaycan Cüdo Federasiyasının və Masallı Rayon İcra Hakimiyyətinin dəstəyi, “Masallı Elektroniks” şirkətlər qrupunun sponsorluğu, “Asiya.az” xəbər portalının media dəstəyi ilə təşkil edilib.
Turnirdə İcra Hakimiyyətinin başçısı Araz Əhmədov, hüquq-mühafizə orqanları, idarə, müəssisə və təşkilat rəhbərləri, şəhid ailələri, qazilər, cüdoçu İlham Zəkiyev və rayon ictimaiyyəti iştirak ediblər.
Cənub bölgəsinin incisi “Halay” folklor və “Masallı” rəqs qrupları öz rəqs nömrələri ilə idmançıları təbrik ediblər. Masallı Xalq Teatrı Cəfər Cəfərovun eyniadlı pyesi əsasında səhnələşdirdiyi “Şuşa ətrin duyulur” tamaşasından “Şuşanın azad edilməsi” səhnəsini nümayiş edib. Döyüş səhnəsini Masallıdan olan peşəkar idmançılar və Vətən müharibəsi qaziləri canlandırıblar.
Qeyd edək ki, yarışda 2009-2010, 2011-2012 və 2013-2014-cü il təvəllüdlü idmançılar 38, 42, 46, 50, 66 kq (2009-2010), 30, 38, 42 kq (2011-2012), 27, 34, 42 kq (2013-2014) çəki dərəcələrində mübarizə aparıblar. Sonda fəxri qonaqların və idmançıların mükafatlandırma mərasimi keçirilib.
