Masallı şəhərində gənc güləşçilər arasında keçirilən turnir başa çatıb. Bu haqda məlumatı Cenublu.az bu gün, 23 oktyabr tarixində verir.
Olimpiya İdman Kompleksində baş tutan yarışda 20-dən artıq komandanın tərkibində 200-dən yuxarı yeniyetmə pəhləvan qüvvəsini sınayıb. Burada 2007-2009-cu il təvəllüdlü yunan-romaçılar 11 çəki dərəcəsində mübarizə aparıblar.
Turnirin yekun nəticələrinə əsasən, Sumqayıt komandası birinci, Göyçay ikinci, Masallı komandası üçüncü yerə layiq görülüb. Sonda qalib idmançılar müvafiq dərəcəli diplom, medal və pul mükafatları ilə təltif olunublar.
Tədbir Azərbaycan Güləş Federasiyası və Lənkəran-Astara Regional Gənclər və İdman İdarəsinin təşkilatçılığı, Rusiya Federasiyasının Əməkdar məşqçisi, Şimal-Qərb dairəsi üzrə Güləş Federasiyasının prezidenti Məşkur Qasımovun dəstəyi ilə həyata keçirilib.
Qeyd edək ki, yarış tanınmış pəhləvan Nadir Yaqub oğlu Ağayevin xatirəsinə həsr olunub.
