Masallıda uşaq və yeniyetmələr arasında cüdo idman növü üzrə açıq rayon turniri keçiriləcək. Bu haqda məlumatı Cenublu.az bu gün, 20 iyun tarixində Masallı rayon Gənclər və İdman İdarəsinə istinadən verir.
Masallı Rayon Gənclər və İdman İdarəsinin təşkilatçılığı, Azərbaycan Cüdo Federasiyasının və Masallı Rayon İcra Hakimiyyətinin dəstəyi ilə keçirilən turnirin açılış mərasimi 21 iyun tarixində, saat 15:00-da Masallı Olimpiya Kompleksində başlayacaq.
Qeyd edək ki, turnir ümummilli lider Heydər Əliyevin 100 illik yubileyi və 26 İyun – Azərbaycanın Silahlı Qüvvələri Günü ilə əlaqədar olaraq Azərbaycan Respublikasının ərazi bütövlüyü uğrunda gedən döyüşlərdə şəhidlik zirvəsinə ucalan Masallının şəhid cüdoçuları - Nurlan və İntiqam Əsgərli qardaşlarının timsalında bütün Masallı şəhidlərinin xatirəsinə həsr olunur.
